Luster eldreråd har i 2024 hatt 6 møte og behandla 34 saker. Rådet har vore tydelege på eigne satsingsområde, og har gitt ei rekkje innspel til kommunale planar og strategiar – mellom anna helse- og omsorgstenester mot 2030, samlokalisering av institusjonstilbod og tiltak mot einsemd blant eldre.
Digital opplæring
Rådet er særleg opptekne av god digital opplæring for eldre, og oppmodar om å søkje prosjektmidlar for å sikre at alle får ta del i den digitale kvardagen. Dei peikar også på kor viktig dette er for å bu trygt og godt heime så lenge som mogleg.
Eldrerådet løftar fram frivillig innsats
Eldrerådet understrekar kor viktig frivillig innsats er – både i dag og i framtida – på fleire område i kommunen. Dei viser til kommunestyret sitt vedtak om politisk frivilligerklæring, og peikar på behovet for ein frivilligkoordinator i Luster. Eldrerådet ynskjer å bli haldne orienterte og tekne med i det vidare arbeidet med å følgje opp vedtaket.
Samarbeid
Gjennom året har eldrerådet samarbeida tett med administrasjonen, rådet for personar med funksjonsnedsetting og Luster pensjonistlag. Fellesmøte og deltaking i referansegrupper har gitt nyttige arenaer for medverknad. Rådet trekkjer fram den gode dialogen med kommunen som ein av suksessfaktorane.
Eldredagen
I oktober arrangerte rådet eldredag på Eikum hotell, med godt oppmøte, underhaldning og informasjon om viktige satsingar.
Eldrerådet har også vore på kurs, og teke initiativ til å få i gang att regionmøte mellom eldreråda i Sogn.
Rådet ynskjer å vere ein aktiv medspelar for å gjere Luster til ein god kommune å bli gammal i.
Årsmeldinga 2024 (PDF, 640 kB)