Med Jon Ove Lomheim som leiar, har dei vore tett på dei store prosessane i kommunen. Dei har hatt fellesmøte med eldrerådet og fått god informasjon frå administrasjonen om mellom anna helse- og omsorgstenester mot 2030, flyktningsituasjonen, nye barnehageplanar på Hafslo og universell utforming av kyrkjene.
Engasjert og handlingsretta
Rådet har både vore høyringsinstans i store politiske saker, som budsjett og kommunal plan for oppvekst og førebygging, og teke opp eigne initiativ – som universell utforming av sjølvbeteningskassar i butikkane, HC-parkering, og tilgjenge til kyrkjebenker for rullestolbrukarar.
Særleg har rådet vore oppteken av HC-parkering i kommunen. Dei har peika på manglande skilting, for bratte plassar og behov for overbygde løysingar med moglegheit for lading av HC-bilar.
– Tilkomsten må vere på plass om folk skal kunne bruke tenestene – anten det gjeld helsehjelp, skule eller fritidstilbod, understrekar rådet.
Tilgjengeprisen 2024
I 2024 gjekk Tilgjengeprisen til «Tilrettelagt friluftsliv» – eit samarbeid mellom Luster Turlag (FTU), NFU Luster lokallag og Luster frivilligsentral.
Formålet med prisen er å setje positivt fokus på arbeidet for å fjerne eller redusere barrierar som hindrar deltaking i samfunnet.
Universell utforming handlar ikkje kun om fysisk utforming, men også om tilrettelegging av aktivitets- og kulturtilbod.
Tilgjengeprisen 2025 skal delast ut i kommunestyret 10. april 2025
Rådet jobbar vidare for eit Luster der alle får delta – på lik linje.
Årsmeldinga 2024 (PDF, 2 MB)